Убаастабыллаах Саха сирин олохтоохторо!

Биһиги өрөспүүбүлүкэбитигэр 1996 сылга олунньу 13 күнэ Төрөөбүт тыл уонна сурук-бичик күнүнэн биллэриллибитэ. Онтон ыла бу күнү Саха сиригэр сыл аайы киэҥ далааһыннаахтык, өрө көтөҕүүлээхтик бэлиэтиир тэрээһиннэр ыытыллаллар. Дьон төрөөбүт тылын уонна култууратын туһугар сомоҕолоһор биир сүрүн үтүө үгэс буолар.

Төрөөбүт тыл – норуот көлүөнэттэн күлүөнэҕэ бэриллэр барҕа баайа. Кэнчээри ыччакка ийэ тылы иҥэрии, оҕону уус-уран литератураҕа угуйуу, төрүт култуураҕа умсугутуу төрөөбүт тылтан быһаччы тутулуктаах. Тыл туруга үөрэх эйгэтигэр олус сабыдыаллыыр. Бу үлэ күүстээхтик барарыгар судаарыстыба усулуобуйа тэрийэр. Ол курдук, 2020-2024 сылларга судаарыстыбыннай уонна төрүт тыллары харыстааһын уонна сайыннарыы диэн Бырабыытылыстыба таһымыгар анал программа ылыллыбыта. Бу программа чэрчитинэн үлэ киэҥ далааһыннаахтык барар. Билиҥҥи сайдыылаах кэмҥэ төрөөбүт саха тылынан араас кинигэлэр,сурунааллар тахсаллар. Куйаар ситимигэр да Саха тылынан саҥарарга-ааҕарга усулуобуйа тэрилиннэ диэтэхпинэ сыыспатым буолуо. Үөрэх тэрилтэлэригэр уһуйаантан саҕалаан үрдүк үөрэх тэрилтэлэригэр диэри төрүт тылы үөрэтиигэ, сайыннарыыга сүрүн болҕомто уурабыт. Төрөөбүт тылынан уус-уран айымньыны ааҕыыга улахан суолтаны уурабыт.

Бу кэрэ-бэлиэ күнүнэн тус бэйэм ааппыттан итиитик-истиҥник эҕэрдэлиибин! Хайа баҕарар норуот төрөөбүт тылын ытык өйдөбүл быһыытынан үрдүктүк өрө тутар, көлүөнэттэн көлүөнэҕэ чөл туруктаах хаалларар, салгыы сайыннарар, харыстыыр үлэни тиһиктээхтик тэрийэр буоллаҕына, кини омук быһыытынан уратыта сүппэт. Төрөөбүт тылбыт маннык сайда турдун, ылбыт тэтиммитин ыһыктыбакка, таһыммытын түһэрбэккэ салгыы баран иһиэҕин.